دەپۋتاتتىڭ ايتۋىنشا, Roblox كۇن سايىن شامامەن 150 ملن ادامدى جينايدى. پلاتفورما اۋديتورياسىنىڭ باسىم بولىگىن كامەلەتكە تولماعان بالالار مەن جاسوسپىرىمدەر قۇرايدى. وسىعان بايلانىستى اتا-انالار, مۇعالىمدەر جانە حالىقارالىق ساراپشىلار الاڭداۋشىلىق ءبىلدىرىپ وتىر.
«ۆيرتۋالدى تاۋەلدىلىك, اگرەسسيۆتى مىنەز-ق ۇلىق, شىنايى ومىردەن الشاقتاۋ, جاسىنا ساي كەلمەيتىن كونتەنتپەن بايلانىس سياقتى قاۋىپتەر بايقالادى. مۇنداي فاكتورلاردىڭ بالالاردىڭ پسيحولوگيالىق دامۋىنا اسەرى ۇزاق مەرزىمدى تەرىس سالدارعا اكەلۋى مۇمكىن», دەپ جازىلعان دەپۋتاتتىق ساۋالدا.
شاپاق ءۇنزيلانىڭ ايتۋىنشا, مۇنداي ينتەرنەت الاڭداردا الاياقتار مەن پەدوفيلدەر دە بەلسەندى ارەكەت ەتەدى. ول ولاردىڭ جۇمىس ءتاسىلىن ەرەكشە اتاپ ءوتتى.
«الدىمەن ويىن ىشىندەگى ۆيرتۋالدى چات ارقىلى بالانىڭ سەنىمىنە كىرەدى. كەيىن اڭگىمەنى Telegram-عا كوشىرەدى, قۇپيا كەزدەسۋگە شاقىرادى. مۇنىڭ سوڭى قايعىلى جاعدايمەن اياقتالۋى مۇمكىن. الاياقتار دا وسىعان ۇقساس ارەكەت ەتەدى. سىيلىق ۋادە ەتىپ, كەيىن اتا-انانىڭ بانك كارتاسىنىڭ ءنومىرىن جانە SMS ارقىلى كەلگەن كودتى سۇرايدى», دەپ ءتۇسىندىردى دەپۋتات.
حالىق قالاۋلىسى كومپانيانىڭ بالالار ءۇشىن قاۋىپسىز ورتا قالىپتاستىردىق دەگەن مالىمدەمەسىنە قاراماستان, ناقتى باقىلاۋ مۇمكىن ەمەس ەكەنىن العا تارتتى. سەبەبى پلاتفورمادا سەكۋندىنا 50 مىڭنان استام حابارلاما تارايدى.
وسىعان بايلانىستى دەپۋتات بىرقاتار ساۋال جولدادى. اتاپ ايتقاندا, قازاقستاندا Roblox-تىڭ بالالار مەن جاسوسپىرىمدەرگە اسەرىنە قاتىستى ارنايى زەرتتەۋ جۇرگىزىلگەن بە. وزگە ەلدەردىڭ تاجىريبەسىن ەسكەرە وتىرىپ, پلاتفورمانىڭ جۇمىسىن شەكتەۋ نەمەسە قوسىمشا باقىلاۋ تەتىكتەرىن ەنگىزۋ قاراستىرىلا ما. سونداي-اق بالالاردىڭ ينتەرنەتتەگى قاۋىپسىزدىگىن قامتاماسىز ەتۋ ءۇشىن قانداي الدىن الۋ شارالارى قابىلدانىپ جاتقانى جانە ىشكى ىستەر مينيسترلىگى مەن باس پروكۋراتۋرادا ونلاين ويىن الاڭدارى ارقىلى جاسالعان الاياقتىق, بوپسالاۋ نەمەسە وزگە دە قۇقىقبۇزۋشىلىق دەرەكتەرى تىركەلگەن بە؟ دەگەن سۇراقتار قويىلدى.
دەپۋتاتتىڭ بۇل باستاماسى ينتەرنەتتەگى بالالار قاۋىپسىزدىگى ماسەلەسىن قايتا كۇن تارتىبىنە شىعارىپ وتىر.
بۇعان دەيىن ماعىناسىز «مەمدەرگە», ونىڭ ىشىندەگى بەيمازمۇن اۋەندەرگە قاتىستى ەل ىشىندە نارازىلىق تۋعان ەدى. اسىرەسە, «Trallallero Trallalla» اۋەنى بالانىڭ عانا ەمەس, ەرەسەك ادامنىڭ دا ساناسىنا كەرى اسەر ەتەتىنى تۋرالى دابىل قاعىلدى.
